Во британските книжарници од денеска е во продажба до сега необјавениот роман на сер Артур Конан Дојл...

Романот The Narrative of John Smith (Раскажувањето на Џон Смит), напишан меѓу 1883 и 1884 година, се сеќавања на човек кој е принуден поради напад на болки во коските да лежи во својата соба.

Конан Дојл како млад автор романот му го пратил на издавачот, но овој бил изгубен во поштата. Книгата е потоа реконструирана по сеќавање, но никогаш повеќе не е пратена за објавување.

„Мојот шок поради нејзиното исчезнување би бил многу помал во споредба со ужасот ако одненадеж се појави испечатена“, се пошегувал еднаш творецот на Шерлок Холмс.

Британската библиотека денеска го објавува романот заедно со аудио верзијата која ја чита актерот Роберт Линдзи.

Четирите тетратки од ракописот исто така се дел од изложбата во библиотеката која трае до 5 јануари.

„Оваа публикација и изложба покажуваат дека се уште постојат нови работи кои можат да се откријат за оваа икона во книжевноста“, рече Рејчел Фос, која е еден од уредниците на романот.

Романот е дел од колекцијата Библиотека од 2007 година и се објавува во договор со фондот Артур Конан Дојл.

Британскиот писател Артур Конан Дојл првата авантура за Шерлок Холмс ја напишал во 1887 година, а тој детектив е запишан во Гинисовата книга на рекорди како најчесто екранизиран лик: во повеќе од 200 филмови го глумеле 70 актери.