Театарот Бољшој во Москва вчера беше отворен повторно, по целосна реконструкција во која се вложени 700 милиони долари за таа зграда да го поврати својот некогашен сјај од 19 век...

Реновирањето траеше шест години, а цел беше огромната зграда да ја поврати целата декорација која се наоѓаше на зградата, а чии делови биле отстранети за време на комунистичките власти.

Театарот доби најсовремено опремена сцена, а направена е и уште една подземна сала.

Главната сала на реновираниот театар Бољшој има 1.743 места. Во реконструкцијата на салата е вложено многу труд, затоа што ѕидовите биле практично изгниени, па било потребно да се поставуваат нови основи.

Театарот Бољшој (во превод Голем театар) е изграден на местото каде што некогаш се наоѓал театарот Петровка, кој изгорел во пожар во 1805 година. Го изградил архитектот Андреј Михаилов, кој во близина го изградил и Малиот театар.

Оригиналното име на театарот Бољшој бил Царскиот бољшој театар на Москва и свечено почнал со работа на 18 јануари 1825 година, со балетската претстава на Фернандо Сор. До тогаш се изведувани само дела на руски композитори, а странските композитори се воведени во репертоарот околу 1840 година.

Пожарот кој избил во 1853 предизвикал голема штета, па требало три години за да биде обновен. Во тек на Втората светска војна, театарот бил погоден од авионска бомба, но веќе кон средината на четириесетите повторно бил отворен, а комунистичките власти од огромната зграда ги отстраниле сите обележја на царска Русија, кои сега се вратени.