Угледниот виенски музеј „Леополд“ се нашол на удар на јавноста поради плакатот со потполно голи тројца фудбалери кои ја најавуваат изложбата на машки актови.

Имено, пред неколку дена во Австријската престолнина осамнале билборди и плакати на кои има тројца „како од мајка родени“ мажи, на што Виенчани бурно реагирале, па музејот морал да ги цензурира.

„Ни стигнаа многу забелешки и затоа моравме на билбордите да ставиме црвена трага. Многу плакати на ‘клучните места’ се исшарани со спрејови. Жал ни е што се случува тоа затоа што веќе наголемо сме во 21 век и мислевме дека е остварен многу поголем напредок, барем кога е уметноста во прашање“, рече портпаролот на музејот Клаус Покорни.

Тој вели дека до сега организирале неколку слични кампањи за изложба на женски актови и дека никој не реагирал така.

Изложбата, која има за цел да покаже како машкиот акт се развивал низ историјата на уметноста, ќе биде отворена овој викенд и ќе трае до 28 јануари.

Ако за време не тој период ја посетите Виена, не пропуштајте ја оваа интересна изложба.