Во Тибет е отворен националниот парк Комолангама, кој ја носи титулата на највисок во светот. Во него се наоѓаат дури пет врвови повисоки од осум илјади метри, вклучувајќи го и највисокиот врв на светот, Монт Еверест.

Во Кина штотуку е отворен највисокиот национален парк на светот. Комолангама се наоѓа на самиот врв на светот, во автономната покраина Тибет, а опфаќа дури пет планини повисоки од осум илјади метри, вклучувајќи го и Монт Еверест, на чиј врв поминува границата меѓу Кина и Непал. Комолангама инаку е кинескиот назив за Монт Еверест.

Освен високите планини, посебна атракција се ледениците, изворите на топла вода и шумските подрачја. Површината на паркот е 78.000 километри квадратни.

„Во националниот парк ќе се фокусираме на зачувување на екологијата и биолошката разновидност и на спречувањето на противзаконската експлоатација на земјата и другите природни ресурси“, изјави Сун Јонгпинг од Туристичката канцеларија на Тибет. Влезницата изнесува околу 1.300 македонски денари.

Инаку, кинеските власти во Тибет во 2015 година планираат да го отворат и највисокиот аеродром на светот, на надморска висина од 4.436 метри.