Американските продуценти покрај „Уметник“, кого го сметаат за најдобар филм, го наградија и режисерското првенче на Анџелина Џоли...

По Златниот глобус и наградите на американските критичари, филмот „Уметник“ на францускиот режисер Мишел Азанависиус ја освои наградата и на Американското здружение на процуденти (PGA).

Оваа црно-бело остварување, кое не враќа во златното доба на „немиот“ Холивуд, победи во конкуренција со седум филмови, меѓу кои и семејната драма „Потомци“, комедијата „Деверуши“ и приказната за расизмот „Помошта“.

„Кога Мишел Азанависиус и јас сонувавме да го снимиме ‘Уметник’, знаевме дека всушност сонуваме да му напишеме љубовно писмо на американскиот филм. Тогаш не ни помислувавме дека ќе ни се оствари дел од американскиот сон“, рече францускиот продуцент Тома Лангман, примајќи ја наградата.

„Уметник“ пред недела дена, на 69-тото доделување на Златен глобус е прогласен за најдобра комедија/мјузикл, а „Потомци“ за најдобра драма, со што овие две остварувања, според многумина, стануваат главни конкуренти за Оскар.

На Анџелина Џоли за филмот „Во земјата на крвта и медот“, кој го напиша, режира и продуцира, и е врачена наградата „Стенли Крејмер“, наменета за филмови кои се занимаваат со провокативни социјални прашања.

Стивен Спилберг ја освои престижната награда „Дејвид О Селзник“, додека неговиот анимиран филм „Авантурите на Тинтин“ ја доби наградата за најдобра продукција на анимиран филм.

Серијата Broadwalk Empire во продукција на HBO ја освои наградата за најдобра драмска серија. Стикомот Modern Family е прогласен за најдобра хумористична серија.

Меѓу добитниците на овогодинешниве 23-ти доделувања на PGA наградите е и документарецот Beats, Rhymes & Life: The Travleres of a Tribe Called Quest за влијателната хип-хоп група A Tribe Called Quest.