Рускиот научник Леонид Ксанфомалити тврди дека има докази за постоење на живот на Венера, најблиската планета до Земјата во правец на Сонцето.

Леонид Ксанфомалити кој работи во институтот за истражување на вселената во Руската академија на науките, ги анализирал фотографиите снимени во текот на руското истражување и слетување на Венера во 1982 година.

Венера е со големина на Земјата, но има густа атмосфера во која доминира јаглеродниот диоксид. Со атмосферски притисок 92 пати поголем во однос на Земјата, без вода и површина со активни вулкани и температура од речиси 894 степени целзиусови, планетата никогаш не е сметена како можна за постоење на некаков облик на живот.

Но, Ксанфомалити во својот текст објавен во списанието „Истражување на соларниот систем“, вели дека руските фотографии прикажуваат предмети кои потсетуваат на „диск“, „шкорпија“ и „капа“. Појасни дека објектите се појавуваат, лебдат и исчезнуваат на различни фотографии снимени од различни точки.

„Ако заборавиме на актуелната теорија за непостоење на живот на Венера, можеме храбро да претпоставиме дека морфолошките одлики на овие предмети наведуваат да помислиме дека сепак има живот“, вели Ксанфомалити.

Научниците веруваат дека вода, па дури и океан некогаш ја покривале Венера, и тоа најмалку две милијарди години. Вселенскиот брод „Венера експрес“ кој го направиле европските инжењери, ја набљудува Венера од 2005 година. Научниците кои работеле на тој проект не донеле слични заклучоци, но ниту пак ја отфрлија можноста за живот на Венера.

Проектот бил посветен на влијанието и ефектот на стаклена градина, поради плашење од еколошка катастрофа, која своевремено ја претворила Венера во планета без живот.