Лекарите од детската болница во Бостон, САД, вчера соопштија дека Алана Шевенел (9) успешно се опоравува.
Хируршкиот зафат е направен во почетокот на неделата за отстранување на агресивен тип на рак од кој девојчето боледува од 2008 година, а кој го нападнал стомакот, црниот дроб, панкреасот, хранопроводот, дебелото црево и слезината.
„Нешто помалку од стотина дена Алана и нејзината баба престојуваа во болница, додека девојчето беше на третман поради редок облик на агресивен рак кој загрози неколку од нејзините внатрешни органи. Кога сите третмани пропаднаа, лекарите предложија трансплатација на повеќе органи со кои би бил отстранет туморот“, се наведува во соопштението на болницата во Бостон, која е една од најценетите во САД.
На девојчето од Мејн му се пресадени органите на неодамна починато дете со иста градба и иста крвна група. Лекарите изразија очекување дека девојчето во целост ќе се опорави.
