Компанијата Apple објавила дека продала три милиони таблет уреди iPad mini и iPad четврта генерација.

Таблет уредите, претставени на 23 октомври, веќе се наоѓаат на пазарот во 34 земји и поради тоа резултатите на продажба не се посебно изненадувачки, дури многумина очекувале и повеќе продадени парчиња.

Сепак, не треба да се заборави фактот дека моментално се продава само Wi-Fi верзијата од iPad mini и новиот iPad од четврта генерација. Другите верзии, со Wi-Fi конекција плус 3G (или 4G услуга, во зависност од земјата) ќе се најдат во продажба за неколку недели, таман пред новогодишните и божиќните купувања.

Од друга страна, за (не)успехот на новите таблети зборува и податокот дека во март, за три дена Apple продаде повеќе од три милиони iPad уреди од третата генерација. Резултатите од продажбата на новите таблети зборуваат во прилог на неодамна објавеното истражување, кое ги изненади многумина, а во кое стои дека Apple успорил со продажбата на таблети и изгубил повеќе од 15% од тој пазар.