Постарите личности кои во текот на две години земале фолна киселина и витамин B-12 во форма на диететски додаток, покажуваат скромно, но охрабрувачко подобрување на меморијата.

Научниците од Австралискиот национален универзитет направиле истражување на повеќе од 700 личности на возраст од 60 до 74 години, од кои половина од нив секојдневно земале пилули фолна киселина (од 400 микрограма) и витамин B-12 (од 100 микрограма), додека останатите добивале плацебо.

Одбрани се неколку личности кои покажувале симптоми на депресија, но кај кои не е дијагнозирана клиничка депресија, затоа што пораните истражувања покажале дека симптомите на депресија во постарите години често укажуваат на зголемен ризик од когнитивни оштетувања.

По година дена, при тестирањето на краткорочното и долгорочното паметење, немало разлика меѓу двете групи, но по две години се појавила мала разлика во корист на испитаниците кои ги земале споменатите витамини.

Меѓу професионалците постојат некои согласности за тоа дека витамините ја подобруваат функцијата на мозокот. Една теорија е дека тие ја намалуваат бројноста на молекулите хомоцистеин, за кој е утврдено дека е во врска со кардиоваскуларните болести и слабеењето на когнитивните функции.