Девојките кои имаат повеќе оброци и ужинки во текот на денот помалку се здебелуваат од оние кои јадат само двапати на ден, покажало неодамна објавено истражување на американски научници.

Студијата која следела 2.000 девојки за време од една деценија, дошла до претпоставки дека честите, а помали оброци и ужнки го одржуваат чувството на ситост и со тоа спречуваат девојките да се прејадат.

Прескокнувањето оброци не е начин да се ослободите од килограми, а ниту избегнувањето на ужинките, забележува Лорена Ричи од универзитетот Калифорнија која учествувала во студијата.

Набљудувањата започнале кога девојчињата имале девет или десет години и траеле една деценија. Во тој период на растење девојчињата кои јаделе пет или повеќе пати на ден добиле во просек 2,5 сантиметри помалку масни наслаги во пределот на половината од оние кои дневно јаделе три или помалку оброци.

Сепак, овие резултати не се доволни за ваквиот начин да се прифати како препорачлив за превенција на здебелувањето кај девојките, но и целокупната популација.

Алисон Филд, од Детската болица во Бостон, која не учествувала во студијата, смета дека таквите резултати можат да бидат последица и на генетиката, а додаде дека студијата не зела во предвид што девојчињата јадат. Сепак, не е исто ако често јадете моркови и јаболки и ако секој час јадете по едно чоколадо.