Само една чаша млеко дневно е доволна за да се зголемат умствените способности, соошти весникот "Дејли мејл", повикувајќи се на американските научници...

Научниците од универзитетот во Мејн открија дека шансите за успех на тестот за меморија и мозочни функции се пет пати повисоки за луѓето кои редовно пијат млеко. Зачувувањето на умствените способности е уште еден голем плус на млечните производи освен придонесот за здрави коски. Затоа научниците препорачуваат да се зголеми потрошувачката на млеко.

"Вистина е дека млечните производи се многу корисни за сите оние кои не треба да се воздржат од нив поради здравствени причини. Од најновите истражувања знаеме дека состојките во нив - калциумот, витаминот Д и магнезиумот, играат улога за намалување на дебелината, дијабетесот и високиот крвен притисок. Сега разбравме дека млечните производи се поврзани и со когнитивните функции" - изјави раководителот на истражувањето, Мерил Елаис.

Млекото содржи значително количество на заситени масти, протеини, калциум, како и витамин Ц. Како повеќе корисно се препорачува млеко со помалку проценти на масленост.

Истражувањето било спроведено на 900 мажи и жени на возраст од 23 до 98 години. Тие биле подложени на серија тестови и задачи за проверка на меморијата.

Резултатите покажуваат дека без оглед на возраста, луѓето кои пијат барем една чаша млеко на ден, имале подобар успех. Највисоките резултати покажале луѓето со најголема потрошувачка на млеко и млечни производи.