Поетот Никола Маџиров, вечерва ќе одржи читање во Берлин, заедно со моментно најпреведуваниот украински поет Јури Андрухович, како и со еден од најистакнатите германски поети Уве Колбе. Домаќини на вечерта ќе бидат уште тројца германски автори, припадници на најновиот бран германска поезија. Традиционалната поетска вечер, која е наречена "Долга ноќ на поезијата" се одржува еднаш годишно во Берлин, во библиотеката "Васертурм". Песните на Маџиров ќе се читаат на македонски и германски јазик, во превод на Александер Зицман, а вечерта ќе настапи берлинскиот композитор Ф.С. Блум, ексклузивец на авангардната издавачка куќа "Мор Мјузик". Како прв македонски добитник на книжевната стипендија "Тандем" за автори од Централна и Источна Европа, Никола Маџиров одржа читање и во култното берлинско арт-кафе "Бургер", заедно со германските автори Даниела Штел и Нора Босонг. Никола Маџиров е објавуван во повеќе списанија и антологии на германски јазик, а добитник е и на наградата "Хуберт Бурда" во 2007 година, кога член на жирито беше неколкукратниот кандидат за Нобеловата награда за литература Петер Хандке.