Мајката на вампирите, Ен Рајс, со жалење ги извести фановите на нејзината Facebook страница дека плановите за новиот вампирски филм пропаѓаат.

Ен Рајс, авторката на серијалот од десет книги „Вампирски хроники“ и уште четириесетина други книги од различни жанрови, на својата Facebook страница објави видео во кое со жалење ги извести фановите дека „Приказната за крадецот на тела“ нема да го гледаме како филм.

Мајката на вампирите сценариото базирано на четвртата книга од нејзиниот серијал го напишала заедно со нејзиниот син, Кристофер Рајс, кој исто така е писател, меѓутоа проблемите настанале поради одбивањето на неколку филмски компании да соработуваат едни со други.

Според вампирските книги на Ен Рајс има снимено два филма, и тоа според првата книга од серијалот, „Интервју со вампирот“ е снимен истоимен филм со Том Круз и Бред Пит во главните улоги, а според втората и третата книга од серијалот, „Вампирот Лестат“ и „Кралицата на проколнатите“, е снимен филм под заедничко име „Кралица на проколнатите“ со Стјуарт Таусенд и Алија во главните улоги.