Актерите Рајан Гослинг и Џош Бролин, наводно се главните фаворити за улогата на Брус Вејн во филмот "Бетмен против Супермен" ("Batman Vs. Superman")...



Како што пишува "Холивуд рипортер", студиото "Ворнер Брос" се уште прави список на актери кои би можеле да се најдат во улога на Брус Вејн.

Улогата на Супермен треба да ја репризира Британецот Хенри Кавил, ѕвездата на најновото продолжение од популарната франшиза, "Човекот од челик".

Гослинг е еден од помладите актери кој наводно се наоѓа на списокот на кој е и Британецот Метју Гуд. Ѕвездата на серијата "Вистинска крв", Џо Манџанело, исто така се "натпреварува" за улогата на Бетмен.



Добро информиран извор близок до "Ворнер Брос" тврди дека еден од "фаворитите" за улогата на Бетмен е и Џош Бролин, додека се споменуваат и имињата на Ричард Армитаж ("Хобитот", "Север и Југ") и Макс Мартини, пишуваат американските медиуми.

Истиот извор рекол дека кастингот се уште не е започнат, а сценариото не е завршено.

Филмот "Бетмен против Супермен" треба да се најде пред публиката во 2015 година, а снимањето треба да започне на почетокот на следната година.