Италија | Агентот на Гонзало Игуаин вели дека напаѓачот нема да го прифати предлогот на Наполи за продолжување на соработката...



Аргентинецот имаше извонредна сезона во која постигна 36 погодоци, најмногу во историјата на Серија А, па првиот човек на Наполи, Аурелио Де Лаурентис најави дека на Гонзало Игуаин ќе му понуди нов побогат договор.

Сепак, агентот на играчот вели дека тие нема да го прифатат предлогот на Наполитанците.

Причина за ваквата одлука се неисполнетите ветувања.

„Гонзало нема да го обнови договорот” – вели Николас Игуаин во интервју за Клос Континентал. „Под овие услови договорот не може да биде продолжен”.

„Тој во целост ќе го одработи сегашниот договор (до 2018) и потоа ќе видиме што ќе се случи”.

Аурелио Де Лаурентис претходно соопшти дека единствен начин за Гонзало Игуаин да замине е доколку некој ја плати откупната клаузула во неговиот договор вредна 94,7 милиони евра.

„Претседателот бара да биде платена клаузулата за Гонзало да замине. Па кога тој има ваков став, ние имаме право да не го обновиме договорот”.

„Кога пристигнавме во Наполи ни беше ветен амбициозен проект, настап во Лигата на Шампионите и освојување на Скудетото, подобрување на структурата и прогрес, но клубот не остана достоен на зборот”.

Извор: 24FUDBAL.com.mk