МЕНИ

Македонија | Вечерва фудбалерите на Шкендија ќе истрчаат на „Сан Сиро“ на мегдан со големиот Милан, тетовскиот тим нема што да загуби, но може многу да добие...

Шкендија го игра најголемиот меч во својата историја, македонскиот вицешампион се среќава со италијанскиот гигант Милан во плејофот од Лига Европа.

Милан е апсолутен фаворит, особено сега кога во тимот има нова енергија со многу нови засилувања кои треба да ги вратат „росонерите“ на победничките патеки.

Шкендија е свесна против кој игра, но на „Сан Сиро“ нема да искочи со бело знаме. Сака да ги потврди добрите игри во Европа со уште една партија на високо ниво и да му пружи силен отпор на големиот противник.

„Големо задоволство ни е што ќе играме со голем тим каков што е Милан. Но не сме дојдени во Милано на прошетка, не планираме пред време да се предадеме, туку сакаме да се прикажеме во најдобро издание“ - вели тренерот на Шкендија, Ќатип Османи.

Шкендија има креативна офанзива која може да му зададе проблеми на Донарума. Тетовчани се покажаа ефикасни во изминатите европски натпревари, а еден од клучните играчи е Ферхан Хасани.

„Имаме одлична атмосфера во тимот, таа е како никогаш досега и тоа ни дава надеж дека ќе одиграме добро на Сан Сиро. Притисокот не е врз нас, а тоа е добра можност да се покажеме во најдобро светло. Ние нема што да загубиме, а можеме многу да добиеме“ - вели Ферхан Хасани.

Натпреварот помеѓу Милан и Шкендија вечерва се игра од 20:45. Реваншот во Скопје е веќе распродаден, па фудбалерите треба да се обидат да се вратат со резултат кој ќе ја направи атмосферата на „Телеком Арената“ уште пожешка.